នៅផ្ទះស្ត្រេស ម៉េចមិនដើរលេងខ្លះ? កន្លែងកម្សាន្តបែបធម្មជាតិមួយនេះ ទេសភាពស្អាត ស្ងប់ស្ងាត់ល្អទៀត

លំហែ៖ ជឿជាក់ថា មួយរយៈធំមកនេះ ប្រិយមិត្តប្រាកដជាស្មុគស្មាញ គិតច្រើនរហូតស្ត្រេស ដោយសារតែបញ្ហាវិបត្តិកូវីដ១៩ ទើបធ្វើឲ្យគ្រប់គ្នានៅតែក្នុងផ្ទះមិនសូវហ៊ានចេញដើរហើរទៅណាលំហែកាយ ជួបជុំគ្រួសារបន្ទាប់ពីសម្រាកពីការងារនោះឡើយ។

ដូច្នេះ ថ្ងៃនេះផងដែរ Admin នឹងនាំអារម្មណ៍ប្រិយមិត្តទាំងអស់គ្នា មកស្គាល់ទីតាំងរបស់កន្លែងកម្សាន្តបែបធម្មជាតិមួយនៅក្នុងទឹកដីខេត្តកំពត ដែលទីនេះពិតជាអាចធ្វើឲ្យអស់លោកអ្នករំសាយអារម្មណ៍តានតឹងបាន ដោយកន្លែងកម្សាន្តនេះមានឈ្មោះថា «រមណីដ្ឋានទំនប់ម្លិច»។

ដោយក្នុងនោះផងដែរ បើយើងនិយាយជារួមទៅ ទីនេះគឺជាបឹងធម្មជាតិមួយដែលបង្កប់នូវរឿងរ៉ាវបែបប្រវត្តិសាស្រ្តកាលពីសម័យខ្មែរក្រហម ហើយវាមានទាំងបរិយាកាសល្អបរិសុទ្ធ មានទឹកបឹងជាប់ជើងភ្នំ មានវាលស្មៅពណ៌បៃតង បូកនឹងការរៀបចំតុបតែង កែច្នៃបន្ថែមបើកជារបរអាជីវកម្មពីប្រជាជនរស់នៅតំបន់នោះ មើលទៅទិដ្ឋភាពផ្ទៃបឹងទាំងមូលពិតជាស្រស់ស្អាត ស្រស់ស្រាយ គួរឲ្យចង់ទៅលេងតែម្ដង។

គួរបន្ថែមផងដែរថា «រមណីដ្ឋានទំនប់ម្លិច» នេះ មានទីតាំងនៅចន្លោះខេត្តតាកែវ និង ខេត្តកំពត ដែលស្ថិតនៅឃុំជ្រេស ស្រុកជុំគីរី ខេត្តកំពត។ មានចម្ងាយប្រមាណជា ៩០គីឡូម៉ែត្រ ពីរាជធានីភ្នំពេញ និងត្រូវធ្វើដំណើរតាមផ្លូវជាតិលេខ៣ ក៏បាន តាមផ្លូវជាតិលេខ ៤១ ក៏បាន៕

សូមទស្សនារូបភាពខាងក្រោម៖ 

រូបភាពពី៖ The 1995-រត្ន័