ម្ហូបដដែលៗមែនទេ? សាករៀនធ្វើ សម្លតុងយ៉ាំ ម្តងទៅ

កម្សាន្ត៖ បច្ចុប្បន្ននេះ តុងយ៉ាំ ក៏ជាម្ហូបអាហារដ៍ពេញនិយមពីមនុស្សជាច្រើន ដែលពួកគេតែងតែធ្វើញ៉ាំ ជាអាហារប្រចាំថ្ងៃ ជាពិសេស សូម្បីតែនៅក្នុងពិធីជប់លៀងធំៗ តុងយ៉ាំ ក៏ជាម្ហូបដែលត្រូវបានដាក់ដើម្បីទទួលភ្ញៀវថែមទៀតផង។ ដូច្នេះ អ្នកទាំងអស់គ្នា អាចរៀនធ្វើទុកញ៉ាំនៅឯផ្ទះ តាមវិធីខាងក្រោម៖

គ្រឿងផ្សំ៖ សាច់មាន់ ២៥០ ក្រាម  ផ្សិត (ផ្សិតចំបើង ឬផ្សិតស) ១៥០ក្រាម  ប៉េងប៉ោះ ១ ទៅ ២ផ្លែហាន់ជាចំណិត  រំដេង  គល់ស្លឹកគ្រៃ  ស្លឹកក្រូចសើច  ម្ទេស  ម្ទេសឆា ៨០ក្រាម  ទឹកដោះគោស្រស់ ១៥០ក្រាម  ទឹកត្រី ៣ ស្លាបព្រាបាយ  ទឹកក្រូចឆ្មា ៣ ស្លាបព្រាបាយ  ម្ទេសក្រៀម  ស្លឹកជីរណាដែលហាន់រួច  ទឹក ៥០០ មីលីលីត្រ ។

របៀបធ្វើ៖

១. ជាដំបូង ដាក់ឆ្នាំងដាំទឹកឲ្យពុះ រួចដាក់រំដេង គល់ស្លឹកគ្រៃ ស្លឹកក្រូចសើច និងម្ទេសចូល រួចទុកមួយរំពុះ ទើបដាក់សាច់មាន់ចូល ដើម្បីរម្ងាស់ឲ្យឆ្អិន

២. បន្ទាប់ពីសាច់មាន់ឆ្អិនហើយ ដាក់ផ្សិត និងប៉េងប៉ោះចូល រួចទុកឲ្យពុះ

៣. បន្ទាប់មកទៀត ដាក់ទឹកត្រី និងម្ទេសឆាចូលទៅ រួចកូរឲ្យរលាយចូលគ្នាទុកមួយរំពុះ សឹមដាក់ទឹកដោះគោស្រស់ចូល ហើយកូរចូលគ្នាឲ្យសព្វ រួចទុកឲ្យពុះ ទើបដាក់ស្លឹកជីរណា ម្ទេសក្រៀម និងទឹកក្រូចឆ្មាចូលទៅតាមក្រោយ ជាការស្រេច៕

ប្រភព៖ Dermkor APP