ទំនេរៗ រៀនធ្វើបង្អែមចេកខ្ទិះ ទុកញ៉ាំខ្លួនឯង!!

កម្សាន្ត៖ បង្អែមចេកខ្ទិះ គឺជាបង្អែមដ៏ពេញនិយមមួយ ក៏ដូចជាបង្អែមចំណូលចិត្តរបស់មនុស្សជាច្រើន ដែលភាគច្រើន ពួកគេតែងតែរកទិញដើម្បីទទួលទានជាអាហារសម្រន់ និងជាបង្អែមលាងមាត់ក្រោយពេលបរិភោគបាយរួច ផងដែរ។ តោះប្រសិនបើមានចំណាប់អារម្មណ៍ចង់ចេះធ្វើ ទុកញ៉ាំនៅឯផ្ទះ អាចសាកល្បងតាមវិធីខាងក្រោម៖ 

គ្រឿងផ្សំ៖  ចេក   ស្ករសកន្លះគីឡូ   អំបិល   សាគូ (គ្រាប់ និង រណា)   ខ្ទិះដូង (ច្របាច់លើកទី១ និង លើកទី២ )

របៀបធ្វើ៖ 

១. ដំបូង យកចេកមកាត់ជាដុំតូចៗល្មម រួចយកទៅត្រាំទឹកអំបិល ដើម្បីកុំឲ្យមានជ័រ

២​. យកឆ្នាំងដាក់ដាំ ដោយចាក់ទឹកខ្ទិះដូងទី ១ ចូល កម្ដៅ និងកូរឲ្យវាពុះ រួចចាក់ចេញ ទុកវាមួយឡែក

៣. បន្ទាប់មកទៀត យកឆ្នាំងដាក់ដាំទឹកខ្ទិះដូងទី ២ រម្ងាស់ឲ្យពុះ រួចដាក់សាគូទាំង២មុខចូល ដើម្បីឲ្យវារីកល្អ ហើយត្រូវកូរវា កុំឲ្យវាជាប់នៅបាតឆ្នាំង 

៤. នៅពេលដែល ទឹកខ្ទិះពុះ ព្រមទាំងសាគូរីកហើយ អាចដាក់ចេកចូលទៅ រួចកូរឲ្យសព្វម្ដងទៀត បន្ទាប់មកដាក់ស្ករ  រួចដាក់អំបិលបន្តិច ហើយកូរវាម្ដងទៀតកុំឲ្យវាជាប់បាតឆ្នាំង ព្រមទាំងរម្ងាស់វាឲ្យពុះ ជាការស្រេច

៥. នៅពេលដែលឆ្អិនហើយ ដួសបង្អែមដាក់ចាន រួចអាចដាក់ខ្ទិះដូងទី ១ ដែលបានចម្អិន ដើម្បីឲ្យបង្អែមរឹតតែឈ្ងុយឆ្ងាញ់ ៕ 

ប្រភព៖ COOKER-ASMR