កុំទំនេរអត់ប្រយោជន៍ រៀនធ្វើ ត្រីបឹងកញ្ឆែត ទាំងអស់គ្នា

កម្សាន្ត៖ រឿងអីដែលថាមិនល្បី សម្រាប់មុខម្ហូបដ៏ពិសេសដែលមានការពេញនិយមពីមនុស្សជាច្រើន ជាមួយនឹងម្ហូប ត្រីបឹងកញ្ឆែត ព្រោះមិនត្រឹមតែជាអាហារប្រថ្ងៃសម្រាប់មនុស្សទូទៅនោះទេ តែវាត្រូវបានគេដាក់សម្រាប់ទទួលភ្ញៀវក្នុងកម្មវិធីដ៏ពិសេសជាច្រើន ផងដែរ។ ដូច្នេះហើយ បើចង់រៀនធ្វើទុកញ៉ាំនៅផ្ទះដោយខ្លួនឯង អាចសាកល្បងតាមវិធីខាងក្រោម៖ 

គ្រឿងផ្សំ៖ ត្រី ១ គីឡូក្រាម   កញ្ឆែត  ទឹកត្រី ១ ស្លាបព្រាបាយ  ប្រេងឆាមួយចាន  ស្ករ ២ ស្លាបព្រាបាយ  ដុំខ្លាញ់ជ្រូកចិញ្ច្រាំឲ្យម៉ត់  សណ្ដែកដី  អំបិលកន្លះស្លាបព្រាបាយ  ប៊ីចេងកន្លះស្លាបព្រាបាយ  ខ្ទឹមស  ខ្ទឹមក្រហម  ម្ទេស  គ្រឿងបុកដែលមានដូចជា គល់ស្លឹកគ្រៃ រំដេង និងល្មៀត ។

របៀបធ្វើ៖ 

១. ដាក់ដាំទឹកស្ងោរ ត្រីតែពាក់កណ្ដាលរួចគ្របទុកចោល ១០ ទៅ ១៥ នាទីដើម្បីឲ្យសាច់ត្រីឆ្អិន និងសាច់ត្រីពាក់កណ្ដាលទៀត យកវាទៅបំពងឲ្យឆ្អិន និងស្រួយល្អ 

២. យកគ្រឿងបុករួច មកបុកម្ដងទៀតជាមួយនឹង ខ្ទឹមស ស្លឹកក្រូចសើច ម្ទេស ព្រមទាំងសាច់ត្រីដែលស្ងោរឆ្អិនរួច(បេះយកតែសាច់) និង សណ្ដែកដី 

៣. បន្ទាប់មកធ្វើចិញ្ច្រាំខ្ទឹមស និងចិតខ្ទឹមក្រហម ទុកមួយឡែកទៀត

៤. បន្ទាប់មកទៀត ដាក់កម្ដៅខ្ទះ ព្រមទាំងដាក់ដុំខ្លាញ់ជ្រូកដែលចិញ្ច្រាំរួចកូរឲ្យរលាយ ទើបដាក់ខ្ទឹមស ដែលចិញ្ច្រាំរួចចូល បន្ទាប់មកទៀត ដាក់គ្រឿងបុកជាមួយនឹងសាច់ត្រីមុននេះ រួចកូរឲ្យមានក្លិនឈ្ងុយ ទើបដាក់គ្រឿងផ្សំដូចជា ទឹកត្រី  ស្ករ  ប៊ីចេង  អំបិល  រួចហើយកូរវាឲ្យរលាយចូលគ្នាសព្វល្អ 

៥. រួចហើយ ដាក់ទឹកស្ងោរត្រីមុននេះចូល រួចកូរឲ្យបែកសាច់ត្រី និងពុះ។ បន្ទាប់ពីពុះហើយ ដាក់ត្រីដែលបំពងរួចចូល រួចកូរត្រឡប់ចុះឡើងឲ្យគ្រឿងចូលជាតិជាមួយនឹងសាច់ត្រី ទើបដាក់ខ្ទឹមក្រហម ព្រមទាំងកញ្ឆែតចូល ត្រឡប់ចុះឡើងបន្តិច ទុកឲ្យឆ្អិនជាស្រេច៕  

ប្រភព៖ មេផ្ទះ (Housewife)