ម្ហូបដដែលៗរាល់ថ្ងៃ មិនដឹងធ្វើអី តោះមករៀនធ្វើ ទឹកគ្រឿង ទុកញ៉ាំទាំងអស់គ្នា

កម្សាន្ត៖ ទឹកគ្រឿង ក៏ជាម្ហូបអាហារមួយដែលជាចំណូលចិត្តរបស់មនុស្សជាច្រើន ទាំងចាស់ក្មេង ក្នុងការរៀបចំធ្វើ ដើម្បីទទួលជាអាហារប្រចាំថ្ងៃ នៅក្នុងគ្រួសារ។ ដូច្នេះហើយ អ្នកចង់រៀនធ្វើទុកទទួលទាន ព្រោះមិនចង់ញ៉ាំម្អូបដដែល​ៗ អាចសាកល្បងតាមវិធីខាងក្រោម៖ 

គ្រឿងផ្សំ៖ ត្រី  ប្រហុក  សណ្ដែកដី  ខ្ទឹមស  ស្លឹកខ្ទឹម  ម្ទេស  ប៊ីចេង  ក្រូចឆ្មា អំបិល ស្ករស និង បន្លែសម្រាប់ជ្រលក់ ( ត្រសក់ ផ្កាស្នោរ ពពាយ កញ្ឆែត និងបន្លែជាច្រើនទៀតទៅតាមចំណូលចិត្ត)

របៀបធ្វើ៖ 

១. ជាដំបូង យកត្រីទៅដាក់ស្ងោរឲ្យឆ្អិនជាមុនសិន 

២. ធ្វើការចិញ្ច្រាំ ប្រហុក ​ខ្ទឹមស និងម្ទេស ចូលជាមួយគ្នា រួចចាក់ទឹកស្ងោរត្រីចូលល្មម និងគ្របទុកមួយឡែក

៣. ត្រីដែលឆ្អិនហើយ ត្រូវបេះយកតែសាច់ត្រី រួចយកទៅបុក ព្រមទាំងបុកជាមួយនឹងសណ្ដែកដី ឲ្យម៉ត់ចូលគ្នា 

៤. បន្ទាប់មកទៀត យកសាច់ត្រីដែលបុករួច ទៅដាក់ក្នុងចានប្រហុកដែលដាក់ទឹកស្ងោរត្រីមុននេះ ព្រមទាំងកូរឲ្យសព្វ និងបង់គ្រឿងដូចជា ប៊ីចេង ស្ករស អំបិល ច្របាច់ក្រូចឆ្មា ទៅតាមចំណូលចិត្ត ដោយបន្ថែមជាមួយនឹងស្លឹកខ្ទឹម រួចកូរឲ្យរលាយគ្រឿងសព្វជាការស្រេច៕ 

ប្រភព៖ COOKER-ASMR