ចូលចិត្តញុំាហិរខ្លាំងដូចហោះ? ធ្វើបុកកន្ទុយហេះ ទុកញុំាទៅ ធានាថាត្រូវចិត្ត

កម្សាន្ត៖ បុកកន្ទុយហេះ ជាមុខម្ហូបម៉្យាងដែលមានរសជាតិប្រៃហិរឆ្ងាញ់ មានគ្រឿងផ្សំសាមញ្ញដែលរកទិញបានយ៉ាងងាយ។ បើសិនជាអ្នកចង់ញុំាបុកកន្ទុយនេះ ពិបាករកទិញបន្តិចហើយព្រោះវាជាមុខម្ហូបសាមញ្ញដែលមិនសូវមានគេលក់នោះទេ ដូចនេះហើយយើងធ្វើខ្លួនឯងទុកញុំាតែម្ដងទៅ ដោយគ្រាន់តែធ្វើតាមវិធីខាងក្រោម៖

គ្រឿងផ្សំ៖

១.​ ត្រីឆ្អើរ ៤ចង្កាក់

២. ស្ករត្នោត ១ស្លាបព្រាបាយ

៣. ប្រហុក

៤. ម្ទេសក្រហម ៥០គ្រាប់

៥. ស្លឹកក្រូចសើច ២០សន្លឹក

៦. ខ្ទឹមស ៣ដុំ

៧. រំដេង ១ដុំ ហាន់ជាចំណិតតូចៗ

៨. ម្សៅស៊ុប ១ស្លាបព្រាកាហ្វេ

៩. អំពិល

របៀបធ្វើ៖

១. យកត្រីឆ្អើរទៅបុកឲ្យម៉ត់ហើយទុកមួយឡែកសិន យកប្រហុកមកចិញ្ច្រាំឲ្យម៉ត់រួចយកទៅឆាជាមួយខ្លាញ់រហូតដល់ហួតទឹក។

២. បំពងម្ទេសក្រហម ស្លឹកក្រូចសើចឲ្យស្រគាំបន្តិច រួចយកវាទៅបុកក្នុងត្បាល់ ដាក់ខ្ទឹមសបុកជាមួយរហូតដល់ម៉ត់ល្អ បន្ទាប់មកដាក់ត្រីឆ្អើរដែលបុកម៉ត់នោះចូលក្នុងត្បាល់បុកជាមួយគ្នាឲ្យសព្វហើយដាក់ប្រហុកឆា ដាក់គ្រឿងដូចជាស្ករត្នោត អំពិល រំដេង ម្សៅស៊ុប បុកចូលគ្នាម៉ត់សព្វអស់ហើយដួសដាក់ចាន បន្ទាប់មកញុំាជាមួយអន្លក់បន្លែតាមចំណង់ចំណូលចិត្ត៕

ប្រភព៖ Khmer 360 មុខម្ហូប