ទាន់ពេលទំនេរ មិនថាកូនកាត់ចិនឬកូនខ្មែរទេ ជិតចូលឆ្នាំចិនហើយមករៀនធ្វើ សម្លចាប់ឆាយតាមរូបមន្តពិសេស

កម្សាន្ត៖ តាមចំណាំ ទោះបីមិនមានពិធីសែនចូលឆ្នាំចិនក៏ដោយ ក៏គេតែងតែធ្វើម្ហូបមួយមុខនេះជានិច្ច សម្លចាប់ឆាយនេះយើងអាចដាក់គ្រឿងផ្សំបានច្រើនប្រភេទតាមដែលយើងចូលចិត្ត ប៉ុន្តែមានគ្រឿងផ្សំពិសេសប៉ុន្មានមុខខាងក្រោមនេះ ដែលយើងមិនអាចខ្វះបាននៅពេលធ្វើសម្លនេះដើម្បីឲ្យមានរសជាតិឆ្ងាញ់។

គ្រឿងផ្សំ៖

១. ឆ្អឹងជំនី ជើងជ្រូក ឬសាច់មាន់

២. ស្បែកជ្រូកបំពង

៣. ពពុះសណ្ដែក

៤. ផ្សិតត្រចៀកកណ្ដុរ

៥. បន្លែ ឆៃថាវ ការ៉ុត ស្ពៃក្ដោប ស្ពៃបូកគោ ដំឡូងបារាំង (តាមចំណូលចិត្ត)

៦. ខ្ទឹមស ស្លឹកខ្ទឹម ជីវ៉ាន់ស៊ុយ

៧. អំបិល​ ស្ករស ទឹកត្រី ម្សៅស៊ុប

វិធីធ្វើ៖

១. ដំបូងយើងត្រូវកាប់សាច់ដែលយើងរើសយកមកដាក់ស្ល ជាដុំៗធំបន្តិច យកស្បែកជ្រូក ផ្សិតត្រចៀកកណ្ដុរដាក់ត្រាំទឹករហូតដល់រីកល្អហើយយកមកហាន់ខ្លីៗ។ បន្លែឆៃថាវ ការ៉ុត ដំឡូងបារាំងចិតសំបកលាងសម្អាតទឹកឲ្យស្អាត ហាន់ជាដុំៗ ចំណែកឯស្ពៃក្ដោប ស្ពៃបូកគោ ហាន់វាខ្លីៗល្មម ស្លឹកខ្ទឹម ជីវ៉ាន់ស៊ុយហាន់តូចៗ ខ្ទឹមសចិញ្ច្រាំឲ្យម៉ត់។

២. ដាក់ឆ្នាំងបើកភ្លើងឲ្យក្ដៅសិនហើយចាក់ប្រេងឆាចូល​ ដាក់ខ្ទឹនឲមសម៉ត់ចូលលីងឲ្យឈ្ងុយបន្តិចហើយ ដាក់ ដាក់សាច់ ហើយដាក់ទឹកត្រី ស្ករស អំបិល ម្សៅស៊ុបចូល កូរគ្រឿងទាំងអស់នេះចូលគ្នាឲ្យសព្វដាក់ទឹកបន្តិចទុកប្រហែល៥នាទីទើបដាក់ស្បែកជ្រូកបំពង ផ្សិតត្រចៀកកណ្ដុរ ពពុះសណ្ដែកនិងបន្លែឆៃថាវ ការ៉ុត ដំឡូងបារាំងចូលគ្នាទាំងអស់តែម្ដង។

៣​. យើងទុករំងាស់សម្លដោយចាក់ទឹកចូលម្ដងបន្តិចៗនៅពេលវារៀងខាស់ទឹក រំងាស់បែបនេះប្រហែល២០នាទីហើយចាក់ទឹកឲ្យច្រើនចូលតែម្ដង។ យើងទុកវាដល់ពុះម្ដងទៀតភ្លក់មើលរសជាតិថែមថយគ្រឿងត្រូវចិត្តហើយ ចាំដាក់ស្ពៃក្ដោប ស្ពៃបូកគោ ហើយពេលពុះលើកនេះ យើងអាចបិទភ្លើងបាន ហើយដួស សម្លចាប់ឆាយ ដាក់ចាននិងថែមស្លឹកខ្ទឹមនៅពេលទទួលទាន៕

ប្រភព៖ មេផ្ទះ (Housewife)