មករៀនធ្វើខត្រី រសជាតិឆ្ងាញ់ តាមវិធីត្រឹមត្រូវមិនឲ្យបែកសាច់ត្រី

កម្សាន្ត៖ បើសិនជាយើងចង់ធ្វើត្រីខមួយមុខនោះគឺវាមិនពិបាកនោះទេ យើងអាចរើសវិធីចម្អិនតាមទម្លាប់ខ្លួនឯងបាន តែអ្វីដែលសំខាន់នោះគឺការចម្អិនឲ្យបានត្រឹមត្រូវតាមក្បួន ដើម្បីធ្វើម្ហូបមួយមុខធម្មតាក្លាយទៅជាម្ហូបពិសេសឈ្ងុយឆ្ងាញ់ជាប់ចិត្ត។ ដូចនេះដើម្បីទទួលបានខត្រីមួយចានដែលមានរសជាតិពិសេសនោះ សូមរៀនតាមវិធីខាងក្រោម៖

គ្រឿងផ្សំ៖

១. ត្រី​ ១គីឡូក្រាម (យើងអាចយកត្រីកាម៉ុង ឬត្រីព្រួលក៏បាន)

២. ទឹកត្រី ៣ស្លាបព្រាបាយ

៣. ស្ករត្នោត ៥ស្លាបព្រាបាយ

៤. ម្រេច ១ស្លាបព្រាកាហ្វេ

៥. ខ្ទឹមស ៥កំពឹស

៦. ម្សៅស៊ុបមាន់ ១ស្លាបព្រាកាហ្វេ

៧.​ ប៉េងប៉ោះទុំ (ប៉េងប៉ោះធំ)

របៀបធ្វើ៖

១. យកត្រីលាងសម្អាតឲ្យស្អាត ហើយដាក់ក្នុងចាន ចាក់ទឹកត្រីចូលប្រលាក់លាយជាមួយត្រីឲ្យសព្វ ដាក់ចូលក្នុងទូរទឹកកកប្រហែល២ទៅ៣ម៉ោង ដើម្បីឲ្យសាច់ត្រីរឹងល្អ។ លាងប៉េងប៉ោះឲ្យស្អាតហើយទុកមួយឡែកសិន។

២. បុកម្រេចឲ្យម៉ត់ល្អ បើសិនជាចូលចិត្តហិរអាចបន្ថែមម្រេចទៀតក៏បាន នៅពេលបុកម្រេចម៉ត់ហើយដាក់ខ្ទឹមសចូលបុកឲ្យម៉ត់ដួសទុកសិន។

៣. ដាក់ឆ្នាំងចាក់ស្ករត្នោតចូលហើយបើកភ្លើងតិចៗ កម្លោចស្ករត្នោតឲ្យរលាយនិងចេញពណ៌ក្រហមហើយ ចាក់ម្រេចបុកនោះចូល កូរវាចូលគ្នា ដាក់ទឹកត្រី៣ស្លាបព្រាបាយឬលើសនឹងក៏បានបើចង់ឲ្យរសជាតិរាងធ្ងន់ បន្ទាប់មកយកប៉េងប៉ោះមកតម្រៀមក្នុងឆ្នាំងទាំងអស់ ហើយដាក់ត្រីតម្រៀបពីលើ យកម្សៅស៊ុបមាន់រោយពីលើត្រី ចាក់ទឹកចូលប្រហែល១ចានចង្កឹះ រួចបិទគម្របឆ្នាំងទុកឲ្យវាពុះបន្តិចសិន។

៤​. នៅពេលខត្រីពុះហើយ យើងនឹងឃើញវាមានទឹកច្រើនដែលចេញពីត្រីនិងប៉េងប៉ោះ ហើយយើងថែមទឹកបន្តិចម្ដងៗនៅពេលវាពុះរហូតដល់ត្រីផុយឆ្អឹង។ នៅពេលត្រីផុយឆ្អឹងហើយ នោះខត្រីយើងឆ្អិនជាការស្រេច៕

ប្រភពពី៖ Mummy and grace