ធ្លាប់តែញ៉ាំបង្អែមគ្រាប់សាគូរស្នូលសណ្តែក តែមិនដែលធ្វើ? សាករៀនធ្វើតាមវិធីងាយៗមួយនេះ

កម្សាន្ត៖ ជឿជាក់ថា ប្រជាជនខ្មែរច្បាស់ជាធ្លាប់បានទទួលទាននៅបង្អែមមួយមុខមានឈ្មោះ បង្អែមគ្រាប់សាគូរស្នូលសណ្តែក ដោយបង្អែមមួយនេះ គេសង្កេតឃើញឃើញលក់នៅតាមផ្សារនានាជាច្រើន។ មិនតែប៉ុណ្ណោះ បង្អែមមួយប្រភេទនេះក៏ជាទីពេញនិយមសម្រាប់បងប្អូនខ្មែរ និយមញ៉ាំជាប្រចាំទុកជាបង្អែមលាងមាត់ ក្រោយហូបបាយរួចផងដែរ។ ហើយខាងក្រោយនេះជាវិធីសាស្ត្រ និងរបៀបធ្វើបង្អែមគ្រាប់សាគូរស្នូលសណ្តែក៖

គ្រឿងផ្សំ៖

១. សាគូរចំនួនកន្លះគីឡូ

២. សណ្ដែកចំនួន៣ខាំកន្លះ

៣. ម្សៅដំណើប១កូនចាន

៤. អំបិលកន្លះស្លាបព្រាកាហ្វេ

៥. ស្លឹកតយចំនួន ៣សន្លឹក

៦. ខ្ទិះដូងមួយកំប៉ុង

៧. ដូងមួយចំហៀង

៨. ស្ករសចំនួន១គីឡូ

៩. ម្សៅលាក

រ​​បៀបធ្វើ៖

១.មុនដំដូងយើងត្រូវយកសណ្ដែកទៅត្រាំឲ្យទន់ បន្ទាប់មកយកវាមកលាងឲ្យស្អាត ហើយដាក់ដាំសណ្ដែកក្នុងឆ្នាំងឲ្យឆ្អិន ឬចំហុយសណ្ដែក៏បាន។

២.យកសាគូរមកឆាឲ្យវាឆ្អិនបន្តិច

៣.ក្រោយចម្អិនសណ្ដែក និងសាគូរឆ្អិនរួចរាល់ទុកវាឲ្យត្រជាក់ រួចយើងត្រូវយកសាគូរលាយជាមួយម្សៅដំណើបឲ្យសព្វល្អ បន្ទាប់មកយកសាច់ដូងដែលបានកោសទុករួចមកលាយបញ្ចូលគ្នា ហើយរូយអំបិល និងស្ករសបន្តិច ដើម្បីបង្កើនជាតិផ្អែមជាប់នឹងសាគូរ។

៣.បន្ទាប់ពីលាយម្សៅដំណើប និងគ្រាប់សាគូរចូលគ្នាសព្វល្អហើយ យើងត្រូវបំបែកសាច់ម្សៅជាដុំៗ ដើម្បីលាយដាក់ពណ៌លាកបង្កើនសម្រស់នៃនំ។

៤. ក្រោយមកទៀត ចាប់ផ្ដើមធ្វើស្នូលសណ្ដែក ដោយសណ្ដែកដែលយើងបានដាំឬចំហុយរួចរាល់ ត្រូវយកមកចំបាច់ឲ្យម៉ដ្ឋ រួចលុញវាជាដុំតូចៗដើម្បីធ្វើស្នូលនំ។ បញ្ជាក់៖ មុននឹងលុញសណ្ដែងជាដុំតូចៗ ត្រូវដាក់សាច់ដូង និងស្ករសបន្ថែម សម្រាប់បង្កើនរសជាតិនៃស្នូលនំ។

៥. ត្រូវយកសាគូរលាយនឹងម្សៅដំណើបមកខ្ចប់វាជាមួយស្នូលសណ្ដែងជារាងមូល រួចដាំទឹកឲ្យពុំសឹមដាប់សាច់នំចូលទឹកក្ដៅ ហើយពេលនំឆ្អិនត្រូវដួសវាដាក់ក្នុងទឹកត្រជាក់។

 ៦. ជាចុងក្រោយត្រូវដាំទឹកស្ករ ដោយគ្រាន់តែដាំទឹកឲ្យពុះ រួចដាក់ស្លឹកតយចូលដើម្បីឲ្យក្លិនឆ្ងុយ ជាបន្តដាក់អំបិលបន្តិច និងខ្ទិះដូងចូលរួចកូរវាឲ្យសព្វ ហើយពេលទឹកខ្ទិះពុះត្រូវដាក់ស្ករសចូលទុកវាឲ្យវាឆ្អិន ចាំដាក់នំសាគូរចូលតាមក្រោយជាការស្រេច៕