តិចអត់ស្គាល់នំចាំង នំនេះគេពេញនិយមណាស់ នៅតាមស្រុកស្រែ

កម្សាន្ត៖ នំចាំងគឺជានំដែលធ្វើឡើងពីអង្ករដំណើបនិងរុំដោយស្លឹកឬស្សី វាមានពីរប្រភេទ មានស្នូលនិងអត់ស្នូល នំចាំងអត់ស្នូលមានរសជាតិសាប ប៉ុន្តែគេនិយមនំនេះច្រើនជាង គេញុំាវាដោយជ្រលក់ជាមួយស្ករស ទឹកដោះគោខាប់ ឬទឹកខ្ទិះ។ នៅតាមស្រុកស្រែភាគច្រើនយើងឃើញគេលក់នំចាំងនៅផ្សារឬដើរលក់តាមផ្លូវ។ បើយើងចង់ស្គាល់រសជាតិនោះអាចរៀនធ្វើនំចាំងតាមវិធីខាងក្រោម៖

គ្រឿងផ្សំ៖

១. អង្ករដំណើប ៥គីឡូក្រាម

២. ទឹកក្បុង ​​១ដប​

៣. ស្លឹកឬស្សី ឬស្លឹកចេកក៏បាន

របៀបធ្វើ៖

១. យកអង្ករដំណើបទៅលាងទឹកឲ្យស្អាតហើយទុកឲ្យស្រស់ទឹកល្អ។ ចាក់អង្ករដំណើបចូលក្នុងចានមួយធំល្មម ហើយយកទឹកក្បុងចាក់ចូល​កូរវាឲ្យសព្វជាមួយអង្ករ ទុកវារយៈពេល៣ម៉ោងសិនដើម្បីឲ្យអង្ករដំណើបរីកចូលជាតិ។

២. ​យកស្លឹកឬស្សីលាងទឹក ជូតឲ្យស្អាត បន្ទាប់មកយកអង្ករដំណើបដែលត្រាំទឹកហើយនោះមកវេចក្នុងស្លឹកឬស្សី៣សន្លឹក ហើយបត់ជារៀងស្រួចដូចរូប រួចយកចំណងមកចងឲ្យជាប់។

៣. ពេលវេចអស់ហើយយកនំទាំងនោះទៅស្ងោរ ដោយដាំទឹកឲ្យពុះហើយដាក់នំចូល យើងត្រូវស្ងោរវារយៈពេល៣ម៉ោង ហើយស្រង់ចេញរួចជាការស្រេច៕