ផឹកតែក្ដៅៗម្ដង តែគល់ស្លឹកគ្រៃងាយស្រួលធ្វើ ឆ្ងាញ់ សំខាន់ជំនួយដល់សុខភាព

កម្សាន្ត៖ គល់ស្លឹកគ្រៃមិនត្រឹមតែអាចយកធ្វើម្ហូបបាននោះទេ ហើយវាក៏អាចយកធ្វើជាតែផឹកបានផងដែរ តែគល់ស្លឹកគ្រៃក្ដៅៗមានរសជាតិផ្អែមឆ្ងាញ់ ជាពិសេសជំនួយដល់ប្រព័ន្ធរំលាយអាហារនិងរក្សារលំនឹងសម្ពាធឈាមទៀតផង។ ចង់ទទួលបានសុខភាពល្អធ្វើតែគល់ស្លឹកគ្រៃផឹកខ្លួនឯងនៅផ្ទះបានតាមវិធីខាងក្រោម៖

គ្រឿងផ្សំ៖

១. គល់ស្លឹកគ្រៃ ២ដើម

២. ខ្ញី ១កូនដុំ

៣. ទឹកឃ្មុំ

៤. ទឹក ៧០០មីលីលីត្រ

របៀបធ្វើ៖

១. យកគល់ស្លឹកគ្រៃកាត់ស្លឹកចេញ យកស្លឹករុំជាដុំមួយ យកគល់ដំឲ្យទក់បន្តិចដើម្បីពេលស្ងោរឲ្យវាចេញជាតិល្អ យកខ្ញីចិតសំបកចេញ ហើយដំឲ្យបែកបន្តិចដែរ។

២.​ ដាក់ដាំទឹកឲ្យពុះ ដាក់ស្លឹកនិងគល់ស្លឹកគ្រៃ​ ខ្ញីចូលហើយបន្ថយភ្លើងសល់ត្រឹមពាក់កណ្ដាល ហើយទុករំងាស់៥នាទីដើម្បីចេញជាតិល្អ។

៣. ពេលទទួលទានគ្រាន់តែដាក់ទឹកឃ្មុំ១ស្លាបព្រាឬលើស តាមចំណូលចិត្ត ហើយចាក់ទឹកតែគល់ស្លឹកគ្រៃដែលចម្អិនរួចនោះចូល កូរឲ្យរលាយចូលគ្នាអាចទទួលទានបានក្ដៅៗ។